Die Kinderbaustelle Rorschach hat gestern feierlich ihren Betrieb aufgenommen. Hier wie versprochen die ersten Schnappschüsse direkt von der Baustelle sowie die Eröffnungsrede von OK-Präsident Fabian Lüchinger:
„D’Faszination zunärä Baustell fangt scho früäh a. „Ohhh häsch dä Bagger gseh?“ „Nei Papi! Da isch denks a Planierraupä!!!“ Mit dä Schuäl chömäd andäri Inträssä und plötzlich sind Chränä, Radlader, Betonmischer, Grabäwalzä und Schaufelradbagger nümä so intressant. Aber ganz weg isch Baustell niä. Ä Baustell ziäht a. Nöd nu d Kinder i dä Erwachsänä, sondern au d Kinder selber.
Wiä viel mol sind di meistä vo üs scho anärä Baustell vöbii gloffä und hend denkt: „Wiä gern wör ich etz mit dem Presslufthammer chli i dä Stross umähackä?“ Mir alli händ e chlini Faszination für Baustellä ii üs!!!
So gohts natürlich au mir. Zimli gnau vor 15 Mönät han i vonärä „Chinder“-Baustell in Wattwil erfahrä und sChind i mir hät mir sofort gsait: „Wiä genial isch da denn? Äs git en Platz, wo Chinder törfäd hämmärä, schuflä und schniida ohni das sMami luut wird wiä wenn sChind da dähai macht.
As git än Ort wommer dörf än Helm und Schutzbrillä alegä, ohni das andäri komisch luägät… Aber i seg eu öpis: z’Rorschach än Platz und däzuä no motivierti Lüüt findä, wo ihri Freiziit opfäräd und da au no ehreamtlich machäd, isch schwieriger als äs tönt. Aber i bi unendlich dankbar, hani do d Laura, d Olga, d Manu, d Laura und d Helene gfundä!! Das mir denn aber gad au no so an fantastischä Platz zur Verfüägig gstellt überchömäd han nöd mol ich dämit grächnät. Noch dä Bauiigob hemmer den gad nomol Glück gha. Do hät sich nämli dä Manuel gmoldä. Er wird während jedärä Öffnigsziit uf dBaustell luägä.
I dä wuchänä druf hemmer lang lang nöd gwüsst, ob und wiä mir da Johr chönd dKinderbaustell Rorschach eröffnä und duräfüärä. I bin immer chli belächlät wordä woni gsait han: „Mir eröffnäd imfall Anfang Juni!!“
Und tatsächlich stömmer etzä do und luägäd uf sBeizli, dä Werkzügcontainer mit Werkstatt und dä Chliichinderbereich. Wer sich nöd zrächtfindät: Än Wegwiiser häts do.
Aber da ganze hinder und vor mir wär nöd möglich gsi ohni di fliisiga Helfer bim Uufbau im Schnelldurchlauf, dOK-Mitglieder wo mit mir immer dem Tag entgega gfiabärät hend und selbstvöständlich dä vielnä vielnä grosszügigä Sponsorä, ohni diä mir hüt sicher nöd wöräd do stoh.
Aber lang gnuäg gredät. Etz will i unbedingt Akkuschruuber, Hämmer und Sägänä ghörä. Herzlich Wilkomä uf dä Chinderbaustell Rorschach!!!“
