Die anständigen Randständigen …

IMG_7471.jpg

Hoi zämä! Mir sind die (R)an(d)ständigä. Sit mer üs üsi Heimat, üsen gliebtä Hafäkiosk jäh weggnoh hät, simmir uf dä Stross. Jo, im Kiosk, döt hemmir immer ächli Wärmi gfundä, mir üsersgliechä & öpä än IV-Schänder – bis äs eines Tages denn aber vil z’warm wordä isch im Kiosk! Etz ziehnd mir amä vo Beiz zu Beiz do z’Rorschach (läck, isch scho guet, hemmir so vil Beizä do, gell!) und hoffäd, dass üs do und döt au ämol öper 1 zahlt – schliesslich hemmir immer au chli öpis z’verzellä us dä Randszenä vo derä sogenannt schönä Hafästadt! Hüt simmir vor allem do, dass ihr alli au chönd do sii – Cliquefasnacht, die wär jo bim ä Hoor gschtorbä, do hend mir gsait, i dem Fall ziehnd mir a dem Obig au durch d’Rorschacher Beizä. Jo, numä wägä eu machäd mir da – wenn’s eu denn am Schluss nöd gfallä hät, denn sinder selber schuld! Wa würäd ihr denn alli süss tue, hüt Obig – ihr alli, wo do im Englers am See, im Rhyfels, im Mariaberg, im Stadthof, im Schnell & garäment au no im Schwizerhof hockäd? So vil wür doch Rorschach gar nöd bütä amä Samschtigobig für eu alli, gell! Und dä René chönnt au nöd so viel Tschatzelis bereit ha im Marabu! Kleider hend mir vo dä Winterhilf übercho – schponsord by Hauser Treuhand!
Mir hend gopfridschtutz kein Kiosk
Mir hend bald ä Raiffisäbank
Mir zwo gsehnd us wien ä Hotel
wo dä Gottfried verreckä loht!

Dä Chabisplatz

Dä Chabisplatz, dä isch jo mengmol verdammt gföhrlich für d’Allgemeinheit wenn döt nöt gad dä Sandhufä vom Thoma mit denä sexy Wieber i dä knappä Hösli stattfindät. Wie heisst da scho wieder? Bitch-Event – ah jo, Bitch Event. Do lauf i im Summer ämol bi dem Parkplatz, wo äbä süss dä Bitch Event isch, vobi – do rasäd doch immer die viereckigä Grinder i denä tüüfgleitä tüürä schnellä gleaste Chärä vobi. Einä hät mi echt fascht umgfahrä, won er quitschend um dä Eggä z’figgä cho isch mit sim Balkan BMW. Won en agluegät ha, maint doch dä :“Hey Altä, was gaffsch man, wodsch ais a dini tum Frässä, man?“ Und vo dem hend do die zwei Mögchtegern-Schmierläppä wo au döt gsi sind – weisch die döt mit dem rotä Büsli mit em 17i druf – wieder kei Kenntnis gnoh. Stattdessä hend doch die nüt gschiders gwüsst, als äm Ober-Zupfer do, weisch äm Niklaus Luuser än Buessäzättel a sin Göppel anä z‘tue, wo dä zum Instrument usladä näbäd dä Paflion gschtellt hät.

Refrain: Mir hend gopfridschtutz kein Kiosk…

Dä Blocher, oder äbä – dä Blogger

Do frogät mit doch vor ä paar Wuchä einä im Zug (bi gad schwarz gfahrä i dä S-Bahn & ha scho Angscht gha, s’seg än Kontrolleur), öb da wohr sei, dass dä Blocher bi üs in Rorschach seg – er hegi da ghört. Do säg i so: dä Blocher, nei da isch keinä vo üs – sowiet simmer gottseidank doch no nöd! Du meinsch wohrschinli dä Blogger – mir hend äbä an Blogger do bi üs z’Rorschach. Da hät denn au nöd jedes Kaff, du! Aber üsen Blocher, äh – etz säg is au no… – üsen Blogger isch än Sozi, aber ganz än tüüf rotä du und kainä vo dä SVP! Isch übrigens än infoffiziells Amt – dä Schtadt-Blogger. Weisch, dä schafft sich sini Ämter mit denä er zunerä so genanntä ‚Person der Öffentlichkeit‘ wird immer selber – wil er no nie für en offiziells Amt gwählt wordä isch. Dä Schtadt-Fotograf isch er übrigens gad au no – weisch au döt vom Rorschacher-Kalender, wo’d weltwiit uf jedem Flughafä chasch chaufä! Jo, mir wünschäd üsem Rorschacher Blocher alläs Gueti für sini witeri politischi Karrierä!